विवादित तपस्वी रामबहादुर बमजनलाई सम्पत्ति शुद्धीकरणको मुद्दामा पुर्पक्षका लागि थुनामा पठाउने आदेश सर्लाही जिल्ला अदालतले दिएको छ। सोमबार न्यायाधीश जीवनकुमार भण्डारीको इजलासले थुनछेक बहसपछि बमजनलाई थुनामा राख्ने निर्णय सुनाएको हो।
८ करोड ५९ लाख रुपैयाँ बराबरको सम्पत्ति शुद्धीकरण मुद्दामा आफैं अदालतमा उपस्थित भएका बमजनमाथि अनुसन्धानपछि मुद्दा दायर गरिएको थियो। चितवनस्थित ६४ लाख मूल्य बराबरको जग्गा र बरामद नगदसमेत मुद्दासँग सम्बन्धित छ।
नेपाल प्रहरीको केन्द्रीय अनुसन्धान ब्युरो (CIB) ले २०८० पुस २४ गते काठमाडौंबाट बमजनलाई पक्राउ गर्दा विभिन्न १७ देशका ३० लाखभन्दा बढी विदेशी मुद्रा र ३ करोड ३४ लाख नेपाली रुपैयाँ बरामद गरेको थियो।
यसअघि, बलात्कार मुद्दामा सर्लाही जिल्ला अदालतले उनलाई १० वर्ष कैद र ५ लाख क्षतिपूर्ति तिर्ने सजाय सुनाएको थियो। तर, उच्च अदालत जनकपुरले उक्त फैसला उल्टाउँदै उनलाई सफाइ दिएको थियो। त्यसपछि रिहा भएका बमजन फेरि सम्पत्ति शुद्धीकरण मुद्दामा थुनामा परेका हुन्।
