काठमाडौँ । नेपालको लुम्बिनी प्रदेश अन्तर्गत गुल्मी जिल्लामा भारत सरकारको आर्थिक सहयोगमा एक नयाँ विद्यालय भवनको निर्माण कार्य सुरु भएको छ। गुल्मीको धुर्कोट गाउँपालिका–३ मा अवस्थित निन्यूखर्क माध्यमिक विद्यालयको भवन निर्माणका लागि मंगलवार आयोजित एक समारोहका बीच शिलान्यास गरिएको हो।
काठमाडौँस्थित भारतीय राजदूतावासका काउन्सलर गीतांजलि ब्रैंडन र धुर्कोट गाउँपालिकाका अध्यक्ष भुपाल पोखरेलले संयुक्त रूपमा विद्यालय भवनको शिलान्यास गरे ।
भारत सरकारको ३ करोड ८० लाख रुपैयाँ आर्थिक सहयोगमा निर्माण हुन लागेको यो विद्यालय भवन ‘उच्च प्रभाव सामुदायिक विकास परियोजना’ अन्तर्गतको हो। नवनिर्मित पूर्वाधारमा फर्निचर र आधुनिक कक्षा कोठाहरू सहितको दुई तल्ले भवन रहनेछ। यस परियोजनाको कार्यान्वयन धुर्कोट गाउँपालिकामार्फत गरिने दूतावासले जनाएको छ।
शिलान्यास समारोहमा बोल्दै धुर्कोट गाउँपालिकाका अध्यक्ष, विद्यालय व्यवस्थापन समिति र स्थानीय सरोकारवालाहरूले शिक्षाको क्षेत्रमा भारत सरकारले पुर्याउँदै आएको निरन्तर सहयोगको प्रशंसा गरेका थिए। नयाँ भवन बनेपछि यस क्षेत्रका विद्यार्थीहरूलाई पठनपाठनमा ठूलो सहजता हुने विश्वास व्यक्त गरिएको छ।
भारतीय दूतावासले नेपाल र भारतबीचको गहिरो विकास साझेदारीको चर्चा गर्दै यो सहयोगले नेपाल सरकारको विकास र समृद्धिको लक्ष्यलाई सुदृढ पार्ने बताएको छ। नजिकको छिमेकी र पुरानो विकास साझेदारको नाताले भारतले नेपालका विभिन्न क्षेत्रमा बहुआयामिक सहकार्य गर्दै आएको छ। यो परियोजनाको थालनीसँगै गुल्मीको स्थानीय शैक्षिकस्तरमा सुधार आउने र नेपाल–भारत सम्बन्धको जनस्तरको सम्बन्ध अझ प्रगाढ हुने अपेक्षा गरिएको छ।
