रुपन्देही–३ को उपनिर्वाचनमा उम्मेदवारी दिने तयारीमा रहेका सन्तोष गिरी यतिबेला निर्वाचन क्षेत्रमा स्थानीयसँग भेटघाट तथा छलफलमा सक्रिय छन्।
तिलोत्तमा नगरपालिका–६, पश्चिम पहुनीका स्थायी बासिन्दा ३३ वर्षीय गिरीको जन्मस्थान पनि रुपन्देही क्षेत्र नं. ३ मै पर्ने भएकाले उनले ‘स्थानीयको भावना र आवश्यकतालाई नजिकबाट बुझ्न’ सहज हुने विश्वास व्यक्त गरेका छन् । हाल उनी ‘ग्राउन्ड जिराे’ लेवलको मूल्याङ्कन गर्दै, समाजका विभिन्न वर्गसँग अन्तर्क्रिया गरिरहेका छन्।
बालेन शाहको सचिवालयमा सल्लाहकारको भूमिकामा रहँदै उनले स्थानीय शासन, नीति निर्माण, र नवप्रवर्तनमा प्रत्यक्ष अनुभव बटुलेका छन्। स्रोतका अनुसार गिरीकाे उम्मेदवारीलाई नयाँ पुस्ताको सहभागिता र वैकल्पिक राजनीतिक शक्तिको प्रतिनिधित्वको रूपमा हेरिएको छ।
विद्यार्थी जीवनमा अखिलको राजनीतिबाट उदाएका गिरीले राष्ट्रिय वादविवाद प्रतियोगितामा प्रथम स्थान हासिलगरेपछि देशैभर चर्चित भएका थिए । त्यस पश्चात उनले ८ वर्षसम्म देशव्यापी युवा शसक्तिकरणको अभियान चलाए ।
संसद र सांसद कस्तो हुने भन्ने विषयमा राष्ट्रिय युवा संसदमा बोलेका उनले त्यसमार्फत पुनः चर्चा बटुले र उनी विभिन्नअन्तर्राष्ट्रिय फोरममा नेपालको प्रतिनिधित्व गर्दै वक्ताका रुपमा प्रस्तुत हुन थाले ।
अर्थशास्त्रमा स्नातकोत्तर र कानूनमा स्नातक गरेका गिरी नेपालस्वीस च्याम्बर अफ कमर्सका प्रमुख कार्यकारी अधिकृत पनि रहेका छन् ।
