काठमाडौं । नेकपा एमालेका नेता ईश्वर पोखरेल पक्षको भेलाले महाधिवेशनमा आफूहरूले उठाएका मुद्दाहरूलाई निरन्तर उठाउने निर्णय गरेको छ ।
शनिबार काठमाडौंमा आयोजित ईश्वर पोखरेल पक्षको भेलाले पार्टीभित्र महाधिवेशनमा उठाएका पार्टीको पुर्नगठन, नेतृत्व हस्तान्तरण, जनताको बहुदलिय जनवादको आधारमा पार्टी निर्माण, नेतृत्व निर्माण, पार्टीको आन्तरिक लोकतान्त्रिकरण लगायतका विषयहरुलाई निरन्तर पार्टीको विधि विधानभित्र बसेर उठाउने निर्णय गरेको पार्टीका उपमहासचिव योगेश भट्टराईले जानकारी दिएका छन् ।
उनले भने, ‘हाम्रो यो भेलाले नेकपा एमालेलाई थप एकताबद्ध र सुदृढ बनाउनको लागि हाम्रो तर्फबट भूमिका खेल्ने निर्णय गरेका छौँ । पार्टीभित्र हामीले महाधिवेशनमा उठाएका मुद्दाहरुलाई ती विचार भनेको पार्टीको पुनगठन, नेतृत्व हस्तान्तरण, जनताको बहुदलिय जनवादको आधारमा पार्टी निर्माण, नेतृत्व निर्माण, पार्टीको आन्तरिक लोकतान्त्रिकरण लगायतका विषयहरुलाई निरन्तर पार्टीको विधि विधानभित्र बसेर पार्टीभित्र निरन्तर उठाउने निष्कर्ष पनि निकालेका छौँ ।’
उनले पार्टीका विभिन्न तहहरुमा आफ्ना विचार सम्प्रेषण गर्ने र छलफल गर्ने निर्णय गरेको पनि बताए । प्रतिनिधि छनोटदेखि बन्दसत्र सञ्चालनभित्र भएका थुप्रै क्रियाकलापहरुले पार्टीको लोकतान्त्रिक अभ्यासमाथि पनि गम्भिर प्रश्नहरु उठाएको भन्दै महाधिवेशनमा पार्टी संरचनाहरुको दुरुपयोग गरिएको पनि उनको भनाई छ ।
उनले भने, ‘प्रतिनिधि छनोटदेखि बन्दसत्र सञ्चालनभित्र भएका थुप्रै क्रियाकलापहरुले हाम्रो पार्टीको लोकतान्त्रिक अभ्यासमाथि पनि गम्भिर प्रश्नहरु उठाएको छ । पार्टी संरचनाहरुको दुरुपयोग गरिएको छ । यसप्रति हामीले चिन्ता व्यक्त गरेका छौँ ।’
