काठमाडौं । नेपालमा विद्युतीय सवारीसाधनको प्रयोगलाई व्यावसायिक रूपमा विस्तार गर्ने उद्देश्यले गो अटोमोबाइल्स र ई-ड्राइभ नेपालबीच ५० वटा ‘एमजी विन्ड्सर कम्युट’ (MG Windsor Commute) उपलब्ध गराउने सम्झौता भएको छ।
जेएसडब्लू एमजी मोटर इन्डियाको आधिकारिक वितरक गो अटोमोबाइल्स प्रालि (GO Automobiles) र राइड सेयरिङ सेवा प्रदायक ई-ड्राइभ नेपाल (E Drive Nepal) बीच भएको यस ऐतिहासिक सम्झौताअनुसार ५० मध्ये पहिलो चरणका १६ वटा सवारीसाधन अगस्ट १३ मा औपचारिक रूपमा हस्तान्तरण गरिएको छ।
सम्झौतापछि बोल्दै गो अटोमोबाइल्सका प्रबन्ध निर्देशक आकाश गोल्छाले यो साझेदारीले नेपालको व्यावसायिक क्षेत्रमा विद्युतीय सवारीप्रतिको बढ्दो विश्वासलाई पुष्टि गरेको बताए। उनले भने, “एमजी विन्ड्सर कम्युटले आराम, प्रविधि र दक्षताको उत्कृष्ट सम्मिश्रण प्रदान गर्ने भएकाले आधुनिक फ्लीट सञ्चालनका लागि यो सर्वोत्तम विकल्प हो।”
त्यस्तै, ई-ड्राइभ नेपालका प्रतिनिधिले एमजी विन्ड्सरलाई आफ्नो फ्लीटमा समावेश गर्दा प्रयोगकर्ताहरूलाई प्रिमियम, किफायती र शून्य-उत्सर्जनयुक्त यात्रा सेवा दिन सहज हुने विश्वास व्यक्त गरे। यसले शहरी क्षेत्रमा स्वच्छ र दिगो यातायात प्रवर्द्धनमा मद्दत पुग्ने उनीहरूको भनाइ छ।
के छन् एमजी विन्ड्सरका विशेषता ?
व्यावसायिक प्रयोजनका लागि ल्याइएको यो विद्युतीय एसयूभीमा फ्लीट सञ्चालक र यात्री दुवैको सुविधालाई ध्यानमा राखिएको छ:
रेन्ज र पावर: यसमा ३८ kWh को ब्याट्री छ, जसले एक पटकको फुल चार्जमा ३३० किलोमिटरभन्दा बढीको रेन्ज दिन्छ। यसको मोटरले १०० kW पावर र २०० Nm टर्क उत्पादन गर्छ।
आरामदायी यात्रा: यसमा १३५ डिग्रीसम्म ‘रिक्लाइन’ गर्न मिल्ने एरो-लाउन्ज सिटहरू (Aero-Lounge Seats) छन्, जसले यात्रीलाई प्रिमियम अनुभव दिन्छ।
नेपाली सडक सुहाउँदो: १८६ मिलिमिटरको उच्च ग्राउन्ड क्लियरेन्सका कारण यो नेपालको चुनौतीपूर्ण सडकका लागि उपयुक्त छ।
छिटो चार्जिङ: र्यापिड चार्जिङ सुविधाले गर्दा सवारीसाधन चार्जमा लाग्ने समय बचत भई व्यवसायमा उत्पादकत्व बढ्नेछ।
वारेन्टी: कम्पनीले यसको हाई-भोल्टेज मोटरमा ८ वर्ष वा १ लाख ६० हजार किलोमिटर र अन्य भागमा ३ वर्ष वा १ लाख किलोमिटरको वारेन्टी प्रदान गरेको छ।
गोल्छा अर्गनाइजेसन अन्तर्गतको गो अटोमोबाइल्सले लामो समयदेखि नेपालमा विश्वस्तरीय अटोमोबाइल ब्रान्डहरू भित्र्याउँदै आएको छ।
सन् २०२२ मा स्थापना भएको ई-ड्राइभ नेपालले सुरक्षित र वातावरणमैत्री राइड-सेयरिङ सेवा प्रदान गर्दै आएको छ। काठमाडौं उपत्यकाबाट सेवा सुरु गरेको यस प्लेटफर्मले हाल देशभर सेवा विस्तार गर्ने लक्ष्य राखेको छ।
यो सम्झौतासँगै नेपालको सार्वजनिक तथा व्यावसायिक यातायात क्षेत्रमा विद्युतीय सवारीको प्रयोगले नयाँ उचाइ लिने अपेक्षा गरिएको छ।
