काठमाडौँ । घर तथा कोठा भाडामा खोज्ने र दिने प्रक्रियालाई सहज र पारदर्शी बनाउने उद्देश्यले डिजिटल रेन्टल मार्केटप्लेस ‘नव निवास’ सञ्चालनमा आएको छ।
गत सेप्टेम्बर २० (२०२६) देखि सञ्चालनमा आएको यस प्लेटफर्ममा हालसम्म १४२ वटा भाडाका सम्पत्तिहरू सूचीकृत भइसकेका छन्। जसमध्ये काठमाडौँमा ८९ र ललितपुरमा ४२ वटा सम्पत्ति उपलब्ध छन्। बाँकी सम्पत्तिहरू भक्तपुर, पोखरा, भरतपुर, वीरगञ्ज, कावासोती र नेपालगञ्जका रहेका छन्।
नेपालमा घरभाडामा लिनका लागि परम्परागत रूपमा प्रयोग हुँदै आएको व्यक्तिगत चिनजान, ब्रोकरको सहारा वा टोल-टोल घुमेर ‘To Let’ बोर्ड खोज्नुपर्ने झन्झटलाई यस प्लेटफर्मले विस्थापित गर्ने लक्ष्य राखेको छ। अब प्रयोगकर्ताले आफ्नो सुविधाअनुसार शहर, क्षेत्र र बजेटका आधारमा घर तथा कोठा खोज्न सक्नुका साथै उपलब्ध सम्पत्तिका तस्बिरहरूसमेत हेर्न सक्नेछन्।
सिधै घरधनीसँग सम्पर्क र शून्य कमिसन
नव निवासका संस्थापक अजर गुरुङका अनुसार प्लेटफर्ममा रहेका अधिकांश सूचीकरण घरधनीहरू आफैँले गरेका हुन्। घरधनीले मोबाइलबाटै केही मिनेटभित्र आफ्नो सम्पत्तिको विवरण राख्न र सम्भावित भाडावालसँग प्रत्यक्ष कुराकानी गर्न सक्ने व्यवस्था मिलाइएको छ।
प्लेटफर्ममा घरधनीको फोन नम्बर सिधै उपलब्ध हुने भएकाले भाडावालले कुनै बिचौलियाको प्रतीक्षा नगरी सोझै सम्पर्क गर्न सक्नेछन्। ब्रोकर तथा एजेन्सीहरूले पनि सम्पत्ति सूचीकृत गर्न सक्ने भए तापनि त्यस्ता सूचीलाई स्पष्ट रूपमा ‘Agency’ भनेर वर्गीकरण गरिएको छ।
नव निवासले घरभाडा वापत कुनै पनि प्रकारको कमिसन नलिने जनाएको छ। प्लेटफर्ममा घर-कोठा खोज्न र आफ्ना सम्पत्ति सूचीकृत गर्न दुवै सेवा पूर्ण रूपमा निःशुल्क छन्। कम्पनीले भाडा वा धरौटी (डिपोजिट) रकमबाट कुनै पनि हिस्सा नलिने स्पष्ट पारेको छ।
विश्वास र पारदर्शितामा जोड
खुला डिजिटल मार्केटप्लेस भएकाले प्रयोगकर्ताको विश्वास र पारदर्शितालाई उच्च प्राथमिकता दिइएको कम्पनीको भनाइ छ। यसका लागि प्लेटफर्ममा सुरुकै दिनदेखि रिपोर्टिङ र मोडरेसनको कडा व्यवस्था गरिएको छ। यदि कुनै एजेन्सी वा ब्रोकरले ‘Agency’ ट्याग नराखी सम्पत्ति सूचीकृत गरेको भेटिएमा प्रयोगकर्ताले तुरुन्तै रिपोर्ट गर्न सक्नेछन्।
हाल प्रारम्भिक चरणमा रहेको नव निवासले आगामी दिनमा देशैभरका घरधनी र भाडावाललाई एउटै डिजिटल सञ्जालमा जोड्ने दीर्घकालीन लक्ष्य लिएको छ।
