एएफसी महिला एसियन कप २०२६ को छनोटअन्तर्गत समूह ‘एफ’ को दोस्रो खेलमा नेपालले आज साँझ श्रीलंकासँग प्रतिस्पर्धा गर्नेछ। उज्वेकिस्तानमा जारी प्रतियोगितामा दुबै टिमबीचको खेल नेपाली समय अनुसार साँझ सवा ६ बजे सुरु हुनेछ।
यसअघिको खेलमा नेपालले लाओसलाई ९-० गोलले पराजित गर्दै बलियो सुरुवात गरेको थियो। उक्त खेलमा कप्तान सावित्रा भण्डारी साम्बाले पाँच गोलसहित कप्तानी पदार्पणलाई ऐतिहासिक बनाएकी थिइन्।
श्रीलंकाले भने आफ्नो पहिलो खेलमा आयोजक उज्वेकिस्तानसँग १०-० को भारी हार व्यहोरेको थियो।
सन् २०१० यता नेपाल र श्रीलंकाबीच भएको आठै खेलमा नेपाल विजयी भएको छ। ती खेलहरूमा नेपालले ३० गोल गर्दा अहिलेसम्म श्रीलंकाबाट कुनै गोल खानु परेको छैन।
गत वर्षको साफ च्याम्पियनसिपमा पनि नेपालले श्रीलंकालाई ६-० ले हराएको थियो।
समूहको विजेता मात्र २०२६ मा अस्ट्रेलियामा आयोजना हुने एसियन कपमा स्थान बनाउने भएकाले नेपालले अन्तिम खेलमा आयोजक उज्वेकिस्तानसँग भिड्नुअघि श्रीलंकाविरुद्ध ठुलो अन्तरको जित निकाल्न लक्ष्य बनाएको छ ।
